Balasan surat Abe Kob kepada Mekna

Sale sjahtero pado Na. Mitok maahla kalu sughak Abe Kob ni sapa tok keno taiming. Mano tau takut nyo kaca Na nok bbaco bok doh mugo SPM jas eraun de koner.

Ptamo skali Abe Kob nok oyat lebih kughe keh keno tepuh ko kheto ggalo dale ghelung aghi tuh. Abe Kob sihak molek-molek takdok apo satu. Bulih make minung po skalo cumo gliak kaki jah sikik. Loni tu jjale kekcah la sikik. Tapi tok kekcok. Muko pulok takdok ccala sikit abok. Mujo la de ngelok ko taya maso tu. Tapi nnaye jauh kkakloh jugok sapa masuk pah ko dale paghik. Dgheba kheto ggalo cekap jugok mugo dio de teke brek. Mujo tok tbalik pun mujo. Tidok gak lenyek la Abe ttipo ko kheto ggalo ibaghak kato supo nge cicok kkepik ppitu.

Banyok ko pegho kuba loni? Bunying kato dok bgheghek sokmo kok atah batah pade. Sedakla Na. Kuba kuba pun ado. Itik sghati pun ado pegho. Haghak ko Abe Kob gapo la hok ado. Muto Honda Kap lapu bulat hok tu jah la wak ppegi maghi. Baghu ni pung mapuh di trefik lait ccabe pak Binja. Stak-stak tok iduk. Pgheh tok soh ghoyak la sapa sebok minyok-minyok. Pah doh jjadi ggitu sakni, heghek alah ktepi takutnya mughih ddemo. Takut de lapu ttuka jjadi kala ija. Doh oghe laing paka muto ganah-ganah ssajo. Ssegho malu kkakloh jugok doh tok cekak kehey tok idup-idup. Napok budok-budok mudo lalu kok tepi. Siak wak nganying lagi set-set dio. Nya pgheh muto habih te. Dale hati bghaso bekok jugok tapi takpola. Nok ngepek kea takut nya katok ddemo. Abe Kob ni pung jenih tok suko maghoh tok ttetu kalu.

How’s life? Haha. Panda jugok Abe Kob spiking. Nok kato panda bena takdok la tapi bulih la sikik2. Aritu Na gi sungguh ko KB Mall? Abe Kob wak lolok jah. Tok seko pulok Na gi sngoti. Siak bowok Mek La lagi wak teme. Mitok maah la banyok-banyok ko Na. Hola tunggu Abe Kob ccokoh situ. Bbetolle aghitu talipong tokde nok boh pitih. Sohko nok talipong nok meseh 10 sen tu pun tok lepah. Mo tidok gak bulih la jugok tanyo-tanyo kaba. Abe ajat nok wat April Ful jah ko Na. Sebok baco sughak Na aghitu. Kaba-kaba gak ttitik tak-tak air mato. Tokde de nok kesat paka nneleh kot pipi. Mujo tok nnaung jah ddale bilik. Buke ggapo tok seko Na saye jugok ko Abe Kob. Ho la mugo Abe ni muko tok sbghapo. Lembu kuba takdok. Ngaji skoloh pun tok bghapo bulih gi. Meme oghe ggela po’ko pun ko Abe dulu. Tapi bersyuko bena doh tu. Hok beghak lagi pun ado. Maso tikate satu oghe ggela kkoghe nyo. Na tok tau mugo Na skoloh lain doh maso tuh.

Abe Kob ingak lagi hok cghito pasa skey putuh duo tu. Molek-molek ado dok mmusing dale ppalo sghupo nge maghing dulu jah baghu jjadi. Tapi taim tu kea kito budok-budok lagi. Abe pun buke ppisoh nok ghepih skey hok Na beli di koperasi tu. Tapi doh Na pege kuak dooh, Abe pung senjoh jah la. Tok seko pulok bulih putuh. Tapi takpo la muking doh takdir nok jjadi ko ggitu. Sapa ko loni Abe Kob ingak. Keh suko kuat dooh sapa gguling atah lata, kelik skoloh pete tu Abe keno pia’ ko mok Abe. Doh baju baghu basuh kelik-kelik cema clotey. Maso tu Daia nge Febreeze pung takdok lagi. Ho la ppeluh ppela dio basuh Abe sene-sene jah wak ccema. Kuat ddooh suko tu mujo tok kkicik dale slua. Kalu tidok gak koho paghok Abe keno behe nge ggeghak sapoh pete tu.

Abe pun sbena meme lamo doh suko ko Na. Tapi wat bodo gitu jah la doh mugo Abe ni tok bghapo jjadi blah mano bahagie tekok lah katah. Sene kato gak muko cannot go on. Ibaghak kato kalu atar gamba nok mitok jjadi model, tokde sapa ajensi model pung eh, di jjabak poh lagi keno rijek. Doh mugo Na ni jenih bara. Kulit putih po kapah, muko pulok licin takdok jghawak sikit abuk. Abe Kob pulok ceghoh sikik jah pado patak kholi. Pah muko gak tok soh ghoyak lah supo jale tar tok siak. Khutuk doh so pah kkasak pulok supo khetah pasir. Sebak tu Abe Kob tok bghani nok pjelas nge Na duduk bangun hal sbenar. Yolah Abe tau sapolah Abe ni. Kalu ccokoh tok samo tinggi pah kalu ccace tok samo ghendoh. (Eh jolo ko gitu? Aah ikut dio lah..). Tapi tulah oghe tuo-tuo dok kato tok kena mako tok cinto. Bilo doh kena bulih kikih hagheto. Hehe. Ggugha jah tu. Abe ingat pah cceghoh doh dok nnepuk tange sbeloh, tapi tok seko Na pung ado sipe hati jugok ko Abe.

Abe Kob knalin sampai tidak dam menyauk baju.

Bilo kene-kene balik jak maso jah satu lagi kito skelah. Na ingat dok ppalo Na keno bola maso klah PJ? Ttekoh Na, Mek La, Anih, Mek Nor nge Mek Song duk maing balloba ttepi pade? Maso tu Abe la hok jong sepak. Nok kato kaki beka sohih doh dok. Nok kato kaki kewek pun dok jugok. Abe uting alah ko gol doh tapi mugo ssaloh gi sepak tojo’ bola nnambung alah ke lain. Tu ya bola nnacar gi caghi ppalo Na. Tok seko pulok taim tu Na nok lopak getoh. Ble-ble lopak, tteleng ppalo-ppalo behe ko bola. Siap jjelir lidoh-lidoh tu hok tok tehe skali. Mulo-mulo nok ssuko jugok dale hati, tapi bilo Na jjeghik kio-kio tu Abe Kob jadi saloh haboh tok tau nok wat guano. Pucak muko-muko. Knalin duda’ duda’ dale dado. Lamo-lamo lepah pado kjadie tu ghaso ssie ttukar jadi ghaso saye. Padaha baghu jah satu taim tu. Nok bbaco pung tok gheti lagi. Sohko nok wak karenge Saya Sebatang Pen.

Na meseh tu buke Abe tokse balah. Pah Na talipong pung buke Abe tokse akak. Buke kato agah. Ego pulok jauh skali. Nok balah guano doh kalu duo tigo bule doh takdok kredik. Kade-kade Na talipong pung Abe tok pghase. Aghitu henset jatuh ttanggo. Nneting stak datah sapa bbowoh. Ghela habih nge hauzing-hauzing. Pah ko kipek ccabut. Ingak ko punoh doh tapi mujo bulih guno lagi. Paka ikak nge getoh ggitu jah. Kretih mugo. Lepah pado tu jjadi tok bbunying nada dering. Buke toksey beli henset baghu tapi keno tolok dulu la Honda Kap tu kkeda besi bughuk. Timbe kilo ko timbe kati takpo blako. Bulih pitih gak baghu bulih beli talipong hok baghu. Tapi kalu de tolok muto ssako tu, nok naik ggapo la pulok Abe. Bghona sokmo pun saye lagi Abe ko dio. Kalu takdok Honda Kap tu gak, Abe Kob supo nge patoh kaki la tokleh geghok kuano. Kade-kade bowok gi cceghuk ghupuk. Mmagha’ alik blake beghak nge ghupuk. Ccongek pun pgheh smace. Sapa bghasak kkelok. Gi ccedong pun sapa ko atah batah Abe bowok gi. Haghak ko tokleh nnapung jah, kalu tidok gak sambung kipah alik blake wat gi klaut doh Honda Kap tu. Napok jah ghebeh ggitu tapi gagoh lagi bo stakak nok gi Kkoto Baghu.

Pah pulok woya talipong ghumoh keno keghik ttikuh aghitu. Putuh gheta tokde de nok tuka hok baghu. Baso tikuh loni jenih lapa nya khobek koksey. Kade-kade keghik supik glenyar. Kade-kade mamoh slipa jepong. Kalu tikuh hok jenih gigi kuak sikik kekoh puyok ddapur. Blete kale habih atah pagho. Hok beghak skali nya nok keghik tlingo Abe taim tengoh tido. Tengoh nnegho molek-molek, segho geli-geli jah cuping. Genyeh-genyeh mato kkejut ka kelih ado tikuh atah lembek. Ado la dale pak limo ekor puok-puok dio. Acu nok libah nge nyapuh, ccuda doh eh laghi. Tapi loni kughe doh sikit skat Abe Kob letok pghakak atah ghabung nge atah glega. Letok upe ike keghing duo tigo ekor ppakak make puok-puok dio. Dea masuk pghakak gak, Abe katok mmapuh pah gi tohok ppayo. Make jaso Honda Kap jugok tu bowok tikuh alah ko ppayo.

Eh panje bena doh ni Abe Kob nnulih. Siak masuk cghito pasa tikuh pulok doh. Tadok ssakuk pauk. Buke ggapo takut Na tokde nok bbaco bok. Tapi Na tu pung jange bbaco guno pelito aye. Mano ttau api-api naik loni takut nok jjimat. Abe Kob ghusing jugok lamo gak punoh mato bbaco dale gelak.

Abe Kob pun nok tido doh ni. Ghipik doh mato-mato dok taha. Ngatuk ttakdi lagi tapi togo’ air neskepi duo tigo jok tehe la smeta. Blah-blah mano pung keno jugok tulis sughak ni bia Na tau hok sngoti. Pah kalu Na ghajing gak balah la pulok. Tapi kalu Na jenih mmalah, Abe pung tokleh kato apo la. Pah tu tulong kighing sale ko Tok Ayoh tu ble-ble. Heghek kuba pete-pete tu baco Bismillah. Takut nya sedo’ ko guano. Baso kuba ni buke bulih haghak sangak. Tanduk panje nnate ggotu. Keno hok tu gak, make tok habih la Na. Pah takpola stakat tu la dulu. Foget me not and stay kip in tac. If yu mis mi, jas rimember mi in yor preyer.

Sale Kerindue,
Abe Kob

Klik sini untuk baca surat Mek Na Kepada Abe Kob sebelum ini…

Comments

Leave a Reply

Your email address will not be published. Required fields are marked *